Kan miphun in cabu ngan/suah dingah in ko- Pahnihnak II.

Ngantu pakhat cun hitin a rak ti dah, “ Casiar hi mi ṭhangso pawl ih nunphung a si ih, cangan hi mi pitling pawl ih mizia pakhat a si”. A ti dik zet in ka thei. Ka hmuh mi le ka ton mi tete pawl ih sin hi thu hi ka zingzawi tikah mi ṭhangso rero pawl hi calai ngaina lo le siar lo ka thei lo tluk a si. Tlawngta an silen, library ah lolen in khalah an cabu thawn a sun a zan ih buan aw tu an si.  Cun, Evangelist, rawngbawltu , pastor le thusim thiam/hlawhtling kan ti mipawl khal hi cabu thawi nitin a thluahhna aw mi an si . Tlawngsuak ih rawngbawlpawl an si khal len an fehnak kipah cabu tha siar ding an keng, cuihleiah  cabu ṭha lei ding mi an sut in an thlennak kipah an hawl vivo.Cutivekin,  an zirnak le rawngbawlnak  a hlawhtlin sinsin theinak dingah thu tharthar in an tim lam aw ringring. Cabu siar a thupit zia thei in John  Wesley tla cun hitin “Cabu a siar dah lo rawngbawltu cu a rawngbawlnak in bang men seh” a ti phah rori. Ṭong dang deuh in kan sim asilen cabu siar cu ṭhansohnak le hlawhtlinnak lam hmuh tu an si. Nan, cui cabu siar ih a ṭhangso mi si ding cun  taimak le lawt kha kan nunah kan bet hrimhrim a ṭul Cuvekin, a siarmi, a zirmi, a taima mi le a zingzawimi in thu in sim le in ruah tikah  a ngaitu mipi hrangah kan harhvan phah in  kan ṭulsam mi diriam ko in kan ngah ṭheu. Cun, a siartu’i nun khalah hlawhtlin sinsin nak -a nun le rawngbawlnak, zirnak ah a nei. Nan, cabu kan siar lo le kan kau lo tikah, mi tampi cu kan hmuhnak a bituk ih mi ih thuruah le rel kan kai ban thei lo, kan hmuthiam thei lo . Culawng hman siloin, hmailam khaw ruahnak(vision) fumfe khal nei thei lo zirnak lam ih mi caklo (slow learner) ah in tuah a si. Curuangah, Dr. Runbik ih casiar kan ṭul a ti mi kha 100% a hman le thupi mi a si in ka thei ve.

“Cangan hi mi pitling mizia a si “ti mi khal hi malte in rawn zoh bet se la. Cangan hi a rak awl ai lo nasa, ngan a tum taktak tu in an thei ding ka zum. Hi ti hawn rel le ṭawngsuah lawk thaw hin an bang aw lo nasa. Ṭawngkam thiam deuh le ṭawng thei deuh hrangah cun nahzi pakhat hnih sung thusim le rel cu a har lem lo tla a si thei, nan, cangan/cabu ngan ti mi cun nahzi pahnih khat men silo in a ni, thla, kum a awh ṭheu. Cabu rotling taktak ngan suak/sualsuak ding phei cun, thi le thau pawlh i beihpi thlak a ṭul a si. Mi an ih, an hngawk dur do can ah, mupi mit bangin fim ker ker ih a sun a zan ti lo ih ngan le thai  a ṭul. Rual le pi an tawih vah, an nawm rero can ah , mi aa bangin mai khan sungte ah, lo len mai pindante ah cuvek khal thlahlel thiam lo bang ih a sun a zan ih thuruah le zingzawi a ṭul. Cangan tui lungthin ah - ziangtin ka cangan mi in a siartu mi pi a neh thei ding, ziangtin ka thungan mi hi an thei thiam awl bik ding, ziang ṭawngkam sawn ka hman len a remcang/theih a awl ding, Zo pawl si ka bah fukfi (focus) deuh ding- mino lam maw nu le pa, Hi ka cabu an siar ṭheh tikah ziang si an zir ngah ding,- Pathian thu lam a silen, ziang tin thlarau lamah an ṭhansohnak ka cabu in a bawm ding, ziangtin rawngbawlnak thinlung an neih sinsin theinak dingah ka cabu in an nun a cawk tho (challenge) thei ding,,, Ziangtin Rundamtu an thei thei ding,,, ziangtin an nun ih phurritpawl an neh thei ding…. Lolen a dangdang tumtah mipawl thawn….Cutivekin, cangantu cun a can sunglawi le theihnak kha mipi pawl tundinnakah(edification) , mi ih an feh ban lonak le paih lo nak peng sungah he le heh ti in a thup ten can an hmang ṭheu. Cuti tik cu le can pek cu thil awl ai a si lo ruangah mitampi cu talent nei ṭha zetzet vek le thu ruat thiam zetzet vekih langpawl khal an kuthnu (hnaṭuan) hmuh ding a um lonak san a si. Asinan, culakah, calai a ngantu le a bu tiang a suahtu pawl hi mi upat tlak ngaingai an si ih, ziangah tilen mi tampi ih feh paih lonakah, an feh, an to, an um, an can an hmang, mitberh thi zik phengpheng ko ih an nuai awk rero can khal a tam a si. Cupawl cun, an fim hleice tuk ruangah siloin, mi pitling an sinak le an taimaknak zarah cabu ṭhaṭha an sersuak ih, Pathian le an miphun, tefa le hrangah rosunglawi an hlan ṭheu a si.

 Asilen, atu nang le kei teh… khawi ah kan um?.. calai a ngai na ih a siar tu tal kan si ban zo maw??. Cumi kan si zo a silen lungawi um tuk.. karbak pakhat kan nei lai.. cumi cu calai a siartu le thlirtu lawng siloin, a ngansuaktu (mi pitling mizia) kha kan hmabak a um lai.. Kan Pathian le ram hrangah nang tui kum teh ziangcabu , ziang cauk, ziang thu le hla ect kan miphun le kohhran in hlawm ve ding??….. scholar rual ih sin… kan Dr. Rual pawl tiang…. Mipi in kan chin calai man awl si, ṭha si siar ding hi kan  cak ṭiai ṭiai…