DUHDAWTNAK CU A CANGVAI

“ Nan hnenah thupek thar ka lo pe, pakhat le pakhat duhdawaw uh. Keimah ih ka lo duhdawt vekin nannih khal pakhat le pakhat duhdawaw uh. Pakhat le pakhat tlunah duhdawtnak nan neih a si ah cun cu mi in mi hmuahmuah in ka dungthluntu nan si khan an lo thei ding"( John 13:34-35)

     

          Duhdawtnak kan ti rero mi hi pumpak ih kan thlan mi a si. Kan nunih kan khansa mi ( feelings) a lan. Mi hrekkhat in an phur lemlo can ih duhdawtnak langter ding cu mi hrawkhrawl ti ah an ruat aw. A ngaingai ih ih kan ti ah cun, kan phur lem lo canah siseh, kan paih lemlo cing khalih duhdawtnak midang parah kan langter a si ah cun cumi cu thuawihnak sawn ruangah a si. Midang duhdawt dingah na feeling na hngak a si ah midang duhdawtnak ding can na nei mal tuk ding. Tawngdang in kan rel asilen cui feeling cu a ra dah lo ding. Feeling hlanah thuawihnak a ra hmaisa ih cule cui thuawihnak cu feeling in a thlun sawn ding a si.

          I John 3: 18 ah cun hitin “ Falenuh, thu lawngin le kaa lawngin duhdawtaw hlah uh si. Tuahnak in le thungaingaiin kan duhdaw aw sawn pei” ti mi kan hmu. Can tampi ah cun kan zummi, kan phuanmi le kan nundan a mil aw theu lo. Mipi kan duhdawt kan ti asinan kan nundan kan zoh asilen ka thu ausuahpi mi le kan nun a mil aw lo theu. 

        Zisu in kaa lawng ih duhdawt ding silo in tuahnak le cangvaihnak thawi duhdawt dingah in sawm. Ziangtin midang tuahnak thawn kan duhdawt ding ti a thunung Baibal sung ih Luke 10” 30-32 ah fiangten in sim,“ Mi pakhat cu Jerusalem khua ihsin Jeriko khua ah a vung feh ih,suamhmangpawl a tawng dukdi hai ih,suamhmangpawl cun a hnipuan anhlihsak theh, bese zetin an vuak,thi ziktein an tanta ih an fehsan. Puithiam pakhat cu cui lamzin zawh in a vung feh ngelcel . Cu pa a hmuh tikah khatlam kapin a hrial ih a fehsan. Cuvek thiamthiamin cu tawkhmun ah Levi mi pakhat a va theng ve. Cu pa cu a va zohta ih khatlam kapin a hrial ih a fehssan ve.” Ngaihman ,hi a tlunih ta pawl hi sakhaw mi an si- An hnatuan kha temple sungih cangvaih a si tikah biakin sunglawngah thiltha tuah ding hmang an ti si pei maw! Bawm a tuk zet mi hliam a tuartu kha an hmu nan an hrial ti kan hmu thei. Pathian hnatuan ih an va mak lawmmam ve tin kan dem a simen thei, asinan kan nih khal anmah vek kan si can vawi tampi a um. Kan mahih tuah le ti ding mi azenda pawl thawn kan buai tuk ih , kan kiangkap ih a aihram rero, a tap rero , a thi rero, bawm a tul mipawl kan hmuh hrelh theu.

       “ Asinan Samaria-pa pakhat cu khualtlawng in cu pai umnak hmun a va thleng. Cule, cu pa a hmuh tikah a parah lainatnak a nei” ( Luke 10: 33). Hi thuanthu a ngaitu pawl mangbangnak ding hrangah, Jesu in Samaria mi cu duhdawtnak langtertu ih zohthim mi si dingah a hmang. Thuanthu ih kan theih le hmuh theu vekin, Jews mi pawl le Samaria pawl pehzawmawknak hi duhum lozet a si.l Asinan,hitawk ah fiangtei kan hmuh mi cu Samaria pa in mangbang vansang ih a umpi pa a hmuh tikah a zangfah, a lainat in a harsatnak bawm a duh ti mi kan hmu. Cutikah, “ A va pan ih a hriamhmapawl ah hriak le sabitzu a tawih hnuah a tuamsak. Amai tilva parah a toter ih , khualbuk ah a hruai. Cule a tuamhlawm. A thaisun a fehsuak zawngah dinari paisa pahnih a suah ih, khualbuk kiltui hnenah a pe. Cule a hnenah, ‘ Hi pa hi run tuamhlawm aw la, na cembet mi hmuahhmuah cu ka rakirsal tikah ka lo rulsal ding” ( Luke. 10: 34-35) ti ah a ti. 

           Duhdawtnak cu a cangvai. Daihlenhli ten a ngui in mi a zohliam men lo. A tuanvo le tiding mi a thei ih a cangvaisuak. Curuangah , duhdawtnak taktak ti mi cu a man tla a khung ngaingai. Samaria pa kha cun amai pumpak ih tuah le ti ding mi –azenda pawl kha a ret tha ih, mi damlo pa ih azenda sungah a luhhnawh. Khai hriamhma tuarpa tuamdan le khawlhfainak ah can ziangmaw tizat cu a cem tengteng ding. Curuanga, duhdawtnak thawi cangvaih timi khal cu a man a khung ngaingai. Khai Samaria pa ih sabitzu, sahriat, dinari paisa pahnih le a can a cem a si. Culawng hman silo in midang duhdawt ti khal cu nunthap tlukih tihnung a si can khal a um. Samaria pa kha a kiang le kap ih suamhmang le misual pawl ih hmuh theih in hliam a tuartu a tuamhlawmnakah a lang. Zumtu kan lakih mi tampi cu mi hrekkhat in kan siatnak an tawlrel in in natter can khal tampi a um ding. Cui kan parih an tuahmi le thilti ih ruangah thinlung na le aanhai ih kan um can khal a tam dingl. Cuihleiah, mi tampi cu cuvek kan tawng canah kan mah le mah huhawk kan duh tuk takah midang hnenah kan harsatnak khal kan ruahsawng duh lo. Rual le tla, midang kan duhdawtnak le duhdawtnak kan neih mi kha tuahnak ih kan lansuah ternak ah mai nun tiang thapngamnak a tel lo cun Jesui thupek kan thlun thei taktak lo. 

           Kanmah minung ih cahnak parah thum aw ih midang va duhdawt dingah Jesus in in fial lo, a sinan a mai cahnak parah thum aw ih va duhdawt dingah thu in pe. “ Amah in in rak duhdawt hmaisat ruangah Amah cu kan duhdawt ve” ti ah I John 4:19 tla cu a ti beet. Jesu hi duhdawtnak thu thawi pehpar aw ih kan tehawknak ding a si. Ziangtluk in duhdawt ti cu tuahnak in hi a hnuai ih Baibal catlang hin in sim “ Misual kan si laiah kan hrangah Khrih cu hrangah a thi” ( Rom 5:8). Pathian ih zangfahnak tello cun Jesui mi a duhdawt vekin kan duhdawt thei lo. Pathian ih in duhdawtnak kha midang kan duhdawt hlanah kan mahah kan cohlan hmaisak a tul. Cumi thehlawngah, Jesui in duhdawt vekin midang duhdawt nak kan langter thei fang. Midang duhdawt ding ah kan phurnak (feeling) menah kan thum aw ding a si lo, kan phurah siseh kan phur lo ah siseh Jesui thupek thlun in tuahnak thawn midang duhdawt ding hi zumtu ih nundan ding lamzin a si. Duhdawtnak cu midang ih tulnak theihsak, bawm le tanpinak in hmangsuak aw. Na kiangnai ih a ummi pawl hnenah siseh, mi harsa bawm a tulmi hennah siseh a takin duhdawtnak thawn cangvai aw la cutin Pathian in thlaw a lo suah ding! Mi ka duhdawt ti si ih cangvai lole tuahnak ih thlun lo kan si ah cun thlilakih innsak men le midang tulnak phuhhruksak ban lo duhdawtnak thi a si ding. Duhdawtnak nung neitu si ding ah Pathian in lo thlawsuah hramseh!