DUHDAWTNAK THAWN THUTAK SIM AW

Khrih bangnak hi thlarau mi sinak hminsinnak a si ih cun duhdawtnak cu Khrih bangnak ih hminsinnak a si. Duhdawtnak cu pehzawmawknak sung lawngah kan hmang suak thei- pakhat le pakhat kan pehzawmawknak tivekah.  Zovek kan si khallen midang thawi kan pehzawmawknak ah kan pumpak duh dan le uar zawng a bangawk lo ruangah a rei maw a bâi maw kan zaten remawklonak le hmuhawk sualnak  kan tawng phah ṭheu. Remawklonak lole duhzawng bangawklonak hi lohhtheih lo ih um ṭheu mi a si hleiah a cângah cun a ṭûl khal a ṭûl. Cui remawklonak le harsatnak cun zirawknak canṭha ka hrangah in pek hleiah Khrih bangnak ih ṭhanglian ding khalin in bawm.

Zocio khalin remawklonak hi mah le ti dan cio in cinfel kan tum. Mi hrekkhat cun remawklonak cinfel dan ṭhabik cu ziangvek zawng in a ra asikhallen a hrial ih hrial hrimhrim hi a si an ti.  Thukam elawk le remawklonak thûksin a suah phan ruangah an kâ an cip, an ngui. Ṭawngdangin kan rel asilen midang pawrhtupawl an si. An kâ ihsin midang ih an theih duhmi thu lawng an sim. A rahsuah mi cu pehzawmawknak puan le lem lawng a thlen. Mi hrekkhat ve thung cun ṭawngkam hrâng, ṭawngkam khâ, mi dang relsiatnak le zuarthlainak thawn cinfel an tum.

A taktak in kan ti asilen kan kâ hi thunun a awl ai lo zet.  Curuangah, Jacob 3:10 tla cun hitin a ti, “ Sihmansehla, lei cu zohman in an ngawingamter thei lo. Lei cu khuahkhirh theih lo thil ṭha lo, thihnak tur thawi khat mi a si. Cu mi thawn kan Pathian le Pa cu kan ṭhangthat ih, cule cu mi thawn Pathian bangnak nei ih tuah mi , milai kan camsiat ṭheu. Cui, kâ thotho ihsin thangṭhatnak le camsiatnak a suak. Ka u le nau tla ,hi thilpawl tla cu cutivekih siding a si lo.” Ziangruangah ? A san cu thinlung sung ih a khat mi kha kâ in a simsuah ṭheu ruangah a si ( Matt. 12: 34-35). Thinlung le taksa lamih hliam a tuarmipawl in ṭawngkam na an ṭawng, mi siava pawlin ṭawngkam khâ an ṭawngsuak.  Cumi cu a si ruangah thleng danglamawk kan ṭulnak san a si. Kan thinlung cutluk ih sual le hrawkhrawl danglam tertu ding ah cun Jesus kan ṭûl a si.

Mi dang mi pakhat khat na relsiat tikah lole an siatnak ding na tawlrel le ruah tikah an mah na hua lole an siatnak ding na duh ti na ruat in na mangngaih dah maw? Thinlung in kâ a mawn tikah , kâ khal in thinlung a mawng ve. Cuti asiruangah kan nih khalin minung lam ih kan ṭuanvo kan lei thununnakin kan tuah ve a ṭûl.  Kan ṭawngkam suak pawl hi an thupi tuk ziangahtilen Pathian in kan ṭawngkam vekin thu in ṭhen leh ding, a sia le a ṭha kan sim siseh kan simsual mi ah siseh. ( Matthai 12: 36-37). Cuihleiah, kan thusim mi in a ngaitu mipipawl a tawp a tawp ah cun a ṭha zawng in siseh a sezawng in siseh a hngawng ding (Thufim 18:21). Pathian zumtu kan sivekin, kan pehzawmawknak thuthawi pehpar aw in kan kiang le kap zumtu dangpawl Pathian lungawizawng in kan hngawng a ṭûl. Cumi cu tuah thei ding cun a zir ih kan zir a ṭûl. Ziangtin pehzawmawknak thûksin le hngetkhoh kan nei thei ding ti mi cu duhdawtnak thawi thutak sim le phuansuah nakin kan zir le thansoh ter a ṭûl a si. Pathian thutak cun hitin Ephesa 4: 15 ah in sim, “ …duhdawtnak in thutak cu sim in, lu a si mi Khrih ah ziangtinkimah kan ṭhanglian thei ding” .

Ziangtin duhdawtnak thawn thutak cu kan sim ding? Baibal in a famkim mi thlun ding 2 Samuel 12 ah in sim.  Kamsâng Nathan cun David cu nupa ṭangṭawm sualnak a tuah le tualthahnak sual ih a tlûk tikah,  zângfah umza tukhaltu le mikhual, a tu note neih sun le a sunsak emem diltu thu in a sim. Cui thuanthu cu a sim theih tikah David ih sualnak cu a sim lang. A netnakah, David cun “ Pathian hmaiah ka sual a si” tin a sawn kirsal. Nathan in David cu sualsirnak ah duhdawtnak thawi thutak a simnak in a hruaikir sal . Cuṭhehah, Nathan cun dik takin ngaidam a si thu a sim nan, a sual man cu David in  cawhkuan a tuar thotho a ṭûl ( 2 Sam 12: 13-14).

Mi pakhat khat thawn remawklonak na tawn cânah, hmakhat te in cinfel tum mai hlah. Na thaw vawn la fel hmaisa tete  in thaten vawn ruat ta aw.  A dinhmun le sinak uluk takih zoh in na thinlung ruahnak thawn ngunngaih takin ruat aw. Mi pakhat khat a lo ningnat tertu, na rem lo mi lole a lo remlotu kha thinhengnak lungput thawi rem na tum a si ah cun na ṭawng lo lawlaw a tha sawn. Na thinlung cu duhdawtnak ih cawhphur mi, mi pakhat nunnak hruaikir ding lungput thawn a si ding a si.  Fimkhurten, ziangtin na ṭawng ding, ziang cânah le khawi hmun ah ti khal kha ruat fel ta aw. Na ṭawngkam hman ding mi pawl kha ralring ten thlang ta aw.  “ Zohman in ṭawng sia nan kâ ihsin suak ter hlah uh. Cuhnakin a theitupawl hnenih Pathian zângfahnak pe theitu ding, tuahṭhatawknak dingih hman ding thil ṭha suak sawn seh ( Eph. 4: 29). Midang a tungding tu ṭawngkam pawl kha hmang in mi a siatsuah tu le thanau ter tu ṭawngkam pawl hrial aw . Cuihleiah, ṭawngkam nêm le duhdawtnak ziaza thiang te thawn sim aw.

Sean Touchy cun hi tin a ti, “  Ṭawngkam hrâng  kamhnih khat in mi pakhat nun a siatsuah thei vekin awkam thlum le nêm cun mi pakhat ih nunnak khal a tuah ṭha thei a si.  A hmangtu le a ṭawngtu ih zirin a ngaitu ih nunnakah thûktak thil a ti thei in a ti lo thei.”  Thutak le mi nun a tungdingtu simnak in duhdawnak cu langter aw cutin mitampi kha khrih bangnak zinah na hruai thei ding a si. Duhdawtnak thawn thutak kan sim cio pei uh!